Burmarrad - Tfal

MARSHMALLOW CAKE

Għeziez ħbieb
Illum ser ngħaddilkom riċetta ħafifa u sempliċi li tistgħu tagħmluha intom stess. Din hija addatata fi żmien tal-Milied għax hija tiġi forma ta' "LOG CAKE" imma b'differenza li hu magħmul mill-marshmallows! Din hija wahda mir-riċetti li għamilna waqt il-

laqgħat tal-preyouths li jsiru kull nhar ta' gimgħa fil-5pm

. Dawn il-laqgħat li huma mmexxija mill-kappillan huma interessanti ħafna għax dejjem nagħmlu u nitgħallmu xi ħaġa differenti u nieħdu gost ħafna flimkien. Issa ser nagħtikom l-ingredjenti u l-metodu għal min jixtieq jippruvah, forsi min jaf tagħtu sorpriża lill-mama tagħkom !!

INGREDJENTI:
500g ġellewż nkaljat u mqatta' biċċiet
300g ċikkulata tat-tisjir
2 mgħaref butir
bajda mħabbta
3 pakketti marshmallows mqatta' bicciet
2 karti tal-ostji
foil biex tgerbeb
METODU:
Ħoll iċ-ċikkulata banju maria u l-butir. X'ħin jinħallu żid il-bajda mħabbta u ħawwad ftit. Niżżel minn fuq in-nar. Żid il- marshmallows u l-ġellewż mat-taħlita taċ-ċikkulata l-butir u l-bajda. Ħawwad kollox flimkien. Ifrex biċċa foil u poġġi l-ostji fuqha. Itfa' taħlita u gerbibha sewwa u agħmilha forma ta' log cake. Poġġi taħlita fil-fridge għal madwar tliet sigħat. Kif jkun lest qatta' slices u servih.
BUON APETIT!!!!!!!!!!! CAW TFAL
Justine Decelis

Il-Qattusa Tiegħi

Il-qattusa tiegħi jisimha Tess. Tess hija qattusa tal-Madonna u għandha tliet kuluri; iswed, oranġjo u abjad. In-nanna tatni din il-qattusa bħala rigal f'għeluq żmieni. Kienet sabitha għand mekkanik u ġabitha d-dar għalija. Jien fraħt ħafna x'ħin rajta għax kont ili nixtieq qattusa u fl-aħħar qtajt xewqti.

Tess tħobb tilgħab ħafna għalhekk inħobbha l-qattusa tiegħi. Hi tħobb tistaħba u meta ngħaddu minn ħdejha toħroġ tiġri biex taqbdilna saqajna. L-iktar li tieħu pjaċir hu meta tgħaffġilha xi karta forma ta' ballun u malli twaddabhielha mal-art tkun qisha qed tilgħab futbol.

Jien ferħan ħafna bil-qattusa tiegħi għax iżżommli kumpanija u ddaħħaqni bl-affarijiet li tagħmel. Tess ferħana wkoll għax inħobbuha ħafna.

Aidan De Carlo

Kif tagħmel PARĊMINA.

Dan li se taqraw huma l-istruzzjonijiet biex tagħmel kartolina tal-parċmina.

1. Ħu karta tal-parċmina li tkun qisha karta strazza bajda.
2. Imbagħad sib xi disinn li tista` ġġibu jew mill-kompjuter kif ukoll minn xi ktieb tal-parċmina.
3. Waħħal id-disinn mal-karta b`xi erba` paperclips u għaddi minn fuqu b`biro bajda.
4. Jekk ikun hemm bżonn tista’ titrejsja xi affarijiet darbtejn biex jiġu doppji.
5. Issa tkun tista` tagħtiha l-kulur bil-lapsijiet.
6. Kif tpenġiha minn quddiem imla wara kollu ċriki bil-kuluri tax-xema`.
7. Imbagħad ħu tissue, u agħmlilha ftit minn dak li tnaddaf iż-żraben il-bojod bih.
8. Ibda agħmel minnu mal-karta biex il-kuluri jiċċaraw u tiġi sabiħa ħafna!
9. Fl-aħħar aqta` b`għodda qishom labar biex jinqatgħu puliti.
10. Il-pass finali hu li titwi l-kartolina u ddaħħal kartonċina kkulurita fejn tikteb.

Issa lesta biex tkun mogħtija lil xi ħbieb jew qrabat.

Emma Fenech

Is-Servizz tal-Abbatini

Kull nhar ta’ Sibt, il-kapillan jagħmel laqgħa ghall-abbatini kollha ta’ Burmarrad mit-3:30p.m. sal-5:30p.m. Il-laqgħa ssir ġo kamra fil-kunvent u wara jkun hemm logħob gol-bitha tal-istess kunvent.
Il-laqgħa ddum nofs siegħa u ħafna drabi nibdew billi naqraw l-Evanġelju tal-Ħadd. Wara l-kappillan isaqsina xi mistoqsijiet fuq l-Evanġelju u jispjega xi affarijjiet tqal. Ġieli nitkellmu fuq xi suġġetti oħra bħall-kmandamenti jew is-sagramenti.
Xi drabi oħra ngħinuh f'xi affarijiet bħal ngħidu aħna nġorru xi affarijiet fil-knisja jew inqassmu xi rivisti tal-knisja. Xi kultant aħna l-kbar ngħinu liż-żgħar kif jagħmlu ċ-ċensier, l-akkolti, it-torċi u xi affarijiet oħra li għandhom x’jaqsmu mas-servzz tal-abbatini. Ġieli nagħmlu mument ta’ qrar.
Wara jkollna ħin għal-logħob. Ħafna drabi nilagħbu futbol u l-kapillan xi drabi jilgħab magħna, jew nilagħbu wkoll ħarba (prisoners).
Dan l-aħħar bdejna nilagħbu l-boċċi wkoll. Wara li jgħaddi naqra aktar minn nofs il-ħin, il-kappillan iġibilna xi ħaga x'nixorbu u x’nieklu u wara nibqgħu sal-5:30p.m.
Nixtieq nistieden lil dawk interessati biex jingħaqdu magħna u jibdew jattendu ghal-laqgha. B’hekk barra li niehdu pjacir, inkunu qed nagħtu s-servizz taghna fuq l-artal.
Fabian Camilleri

Min Huma l-Abbatini.

L-abbatini huma dawk li jgħinu liċ-ċelebrant fil-quddiesa. L-abbatini normalment ikunu subien għalkemm hawn xi parroċċi li jkollhom abbatini bniet ukoll. L-għan tal-abbatini hu li jipparteċipaw b’mod dirett fiċ-ċelebrzzjoni tal-quddiesa. Huwa unur għall-abbati li jkun daqtant qrib ta’ Ġesu` waqt il-qari tal-kelma t’Alla u kull darba li Ġesu jiġi fostna l-bnedmin fil-forma tal-Ewkaristija.
Grazzi Ġesu` li tajtna din il-grazzja u privileġġ.

Josef Grech

Illum ħa nkellimkom fuq xi ħaġa differenti imma interessanti wkoll. Ħa ngħidilkom fuq ċelebrita' li żgur tixtiequ tkunu tafu xi ftit dwarha. Żgur li ġieli smajtu fuq Hannah Montana iżda kontu tafu li.......................................................

Hannah Montana huwa nnominat Emmy Award bħala serje tat-televiżjoni Amerikan u li kien ixxandar l-ewwel darba fl-24 ta' Marzu 2006 fuq Disney Channel. Dan is-serje għandu bħala protagonista tifla li tgħix ħajja doppja bħala studenta tas--sekondarja jisimha Miley Stewart (parti maħduma minn Miley Cyrus) fil-gurnata, u filgħaxija bħala kantanta tal-pop bl-isem Hannah Montana li taħbi l-identita tagħha fil-pubbliku.

It-tielet sensiela ta' Hannah Montana bdiet tinħadem fit-2 ta' Novembru 2008 u spiċċat f'Lulju 2009. Hannah Montana The Movie beda jintwera fic-ċinema fl-10 t'April 2009.

Issa ħa nitkellmu fuq Hannah Montana (bħala persuna). Bħala apparenza Hannah tilbes parrokka bjonda, allura hemm naqra differenza mis-smajra Miley, għalkemm Hannah tilbes ilbies stravagant u ġieli nuċċalijiet tax-xemx kbar. Fl-istorja ta' Hannah Montana, il-famuża parrokka bjonda kienet magħżula għal Miley minn Roxy (il-bodyguard ta' Hannah Montana). Miley Cyrus tgħid li t-tibdila ta' Hannah hija fuq disinn tal-parrina tagħha, il-famuza Dolly Parton. Fit-tielet sensiela l-apparenza tinbidel ftit. Il-parrokka hija iqsar u inqas lixxa u l-ilbies kif diġa għedt jinbidel ukoll.

Nispera li permezz ta' dan it-taghrif sirtu tafu aktar dwar din il-personalita' li tant hija popolari bħalissa magħna l-ġenerazzjoni żagħżugħa!!!